Posted By :  Admin1

ന്യൂ ഡൽഹി: പി.ജി മെഡിക്കൽ കൗൺസലിംഗ് ഇനി മുതൽ ഓൺലൈനിലൂടെ മാത്രമാകും നടക്കുക എന്ന് നാഷണൽ മെഡിക്കൽ കമ്മീഷൻ (എൻ.എം.സി) അറിയിച്ചു. ബിരുദാനന്തര മെഡിക്കൽ വിദ്യാഭ്യാസ ചട്ടങ്ങൾ, 2023 പ്രകാരം പി.ജിയുടെ എല്ലാ സീറ്റുകൾക്കുമുള്ള എല്ലാ റൗണ്ട് കൗൺസിലിംഗുകളും സംസ്ഥാന അല്ലെങ്കിൽ കേന്ദ്ര കൗൺസിലിംഗ് അധികാരികൾ ഓൺലൈൻ മോഡിലൂടെ നടത്തണം എന്നാണ് പറയുന്നത്. 2023 ഡിസംബർ 29-ന് പുറത്തിറക്കിയ ഔദ്യോഗിക പ്രസ്താവനയിൽ, "എല്ലാ സീറ്റുകൾക്കുമുള്ള എല്ലാ റൗണ്ട് കൗൺസിലിംഗുകളും സംസ്ഥാന അല്ലെങ്കിൽ കേന്ദ്ര കൗൺസിലിംഗ് അതോറിറ്റിയുടെ ഓൺലൈൻ മോഡിൽ നടക്കും" എന്ന് വ്യക്തമായി പ്രസ്താവിച്ചു. ഒരു മെഡിക്കൽ കോളേജിനോ സ്ഥാപനത്തിനോ ഏതെങ്കിലും ഉദ്യോഗാർത്ഥിയെ സ്വതന്ത്രമായി പ്രവേശിപ്പിക്കാൻ അനുവാദമില്ലെന്ന് വിജ്ഞാപനത്തിൽ ഊന്നിപ്പറയുന്നു. “ഇപ്പോഴത്തെ ചട്ടങ്ങളിലോ മറ്റ് എൻ.എം.സി ചട്ടങ്ങളിലോ പറഞ്ഞിരിക്കുന്ന ഒന്നിനോടും മുൻവിധികളില്ലാതെ, ഇന്ത്യയിലെ എല്ലാ മെഡിക്കൽ സ്ഥാപനങ്ങൾക്കും മെഡിക്കൽ ബിരുദാനന്തര കോഴ്‌സുകളിലേക്കുള്ള പ്രവേശനത്തിന് അതാത് പരീക്ഷകളുടെ മെറിറ്റ് ലിസ്റ്റിന്റെ അടിസ്ഥാനത്തിൽ മാത്രം പൊതുവായ കൗൺസലിംഗ് ഉണ്ടായിരിക്കും." പുതിയ ചട്ടങ്ങളിൽ പറയുന്നു. പൊതു കൗൺസിലിംഗിന് ആവശ്യമായേക്കാവുന്ന ഒന്നിലധികം റൗണ്ടുകൾ ചിലപ്പോൾ  ഉണ്ടായേക്കാമെന്നും ചട്ടങ്ങളിൽ പറയുന്നു. "സീറ്റ് മാട്രിക്സിൽ വിശദാംശങ്ങൾ നൽകുമ്പോൾ, മെഡിക്കൽ കോളേജുകൾ ഓരോ കോഴ്‌സിനും ഫീസ് എത്രയെന്ന് സൂചിപ്പിക്കണം, ഇല്ലെങ്കിൽ ആ സീറ്റ് കണക്കാക്കില്ല." ഫീസ് വിശദാംശങ്ങളിലെ സുതാര്യതയുടെ പ്രാധാന്യം എടുത്തുകാണിച്ചുകൊണ്ട് ചട്ടങ്ങളിൽ പറയുന്നു.